ലോകമാകെയുള്ള സംഗീത പ്രേമികളുടെ ഹൃദയങ്ങളെ കീഴടക്കിയ തബല വിദ്വാന്: മുഖ്യമന്ത്രി
തിരുവനന്തപുരം: പ്രശസ്ത തബലിസ്റ്റ് ഉസ്താദ് സാക്കിര് ഹുസൈന്റെ വിയോഗത്തില് അനുശോചനം രേഖപ്പെടുത്തി മുഖ്യമന്ത്രി പിണറായി വിജയന്. സംസ്കാരങ്ങളും ഭാഷകളും രാജ്യാതിര്ത്തികളും കടന്ന് ലോകമാകെയുള്ള സംഗീത പ്രേമികളുടെ ഹൃദയങ്ങളെ കീഴടക്കിയ തബല വിദ്വാനാണ് ഉസ്താദ് സാക്കിര് ഹുസൈന്. ഇന്ത്യന് ക്ലാസിക്കല് സംഗീത പാരമ്പര്യത്തില് ആഴത്തിലുള്ള ജ്ഞാനവും അപാരമായ സിദ്ധിയും സാക്കിര് ഹുസൈനെ അനുപമനായ സംഗീതജ്ഞനാക്കി മാറ്റിയെന്നും മുഖ്യമന്ത്രി അനുശോചനത്തില് പറഞ്ഞു.
അതോടൊപ്പം ലോകസംഗീതവും അതിലെ സമകാലിക ഭാവുകത്വങ്ങളും തന്റെ കലയില് അദ്ദേഹം വിലയിപ്പിക്കുകയും അനുവാചകരെ നിരന്തരം വിസ്മയിപ്പിക്കുകയും ചെയ്തു. രാജ്യത്തിന് അഭിമാനം പകരുന്ന ഗ്രാമി ഉള്പ്പെടെയുള്ള അന്തര്ദ്ദേശിയ പുരസ്കാരങ്ങള് നിരവധി തവണ അദ്ദേഹത്തെ തേടിയെത്തി. സാക്കിര് ഹുസൈന്റെ നിര്യാണത്തില് അനുശോചനം രേഖപ്പെടുത്തുന്നു. അദ്ദേഹത്തിന്റെ കുടുംബാംഗങ്ങളുടേയും പ്രിയപ്പെട്ടവരുടേയും ദുഃഖത്തില് പങ്കു ചേരുന്നുവെന്ന് മുഖ്യമന്ത്രി ഫേസ്ബുക്കില് കുറിച്ചു.
