ബാല്‍ താക്കറെയ്ക്ക് ഭാരതരത്ന നല്‍കണം; അതു സവര്‍ക്കര്‍ക്കുമുള്ള ബഹുമതി’; കോണ്‍ഗ്രസിനെ വെട്ടിലാക്കി ശിവസേന
അന്തരിച്ച ശിവസേന സ്ഥാപകന്‍ ബാല്‍ താക്കറെയ്ക്ക് ഭാരതരത്ന നല്‍കണമെന്ന് ഉദ്ധവ് വിഭാഗം ശിവസേന ആവശ്യപ്പെട്ടു. കഴിഞ്ഞ പത്തുവര്‍ഷത്തിനിടെ ബിജെപിയുടെ നേതൃത്വത്തിലുള്ള സര്‍ക്കാര്‍ അര്‍ഹതയില്ലാത്ത ചില വ്യക്തികള്‍ക്ക് രാജ്യത്തെ പരമോന്നത സിവിലിയന്‍ ബഹുമതി നല്‍കിയിട്ടുണ്ട്. എന്നാല്‍ അക്കാലത്തൊന്നും ബാല്‍ താക്കറെയ്ക്ക് ഭാരതരത്ന നല്‍കാന്‍ ബിജെപി തയാറായിട്ടില്ലെന്നും ശിവസേന നേതാവ് സഞ്ജയ് റാവുത്ത് പറഞ്ഞു.
രാജ്യത്ത് യഥാര്‍ഥത്തില്‍ ഹിന്ദുത്വത്തിന്റെ വിത്തുകള്‍ വിതച്ച വ്യക്തിക്ക് ഭാരതരത്നയും നല്‍കണം. എന്തുകൊണ്ട് അദ്ദേഹത്തിന് ഭാരതരത്ന നല്‍കിയില്ലന്നും അദേഹം ചോദിച്ചു. ഹിന്ദുഹൃദയ സാമ്രാട്ട്’ ബാല്‍ താക്കറെയെ പുരസ്‌കാരം നല്‍കി ആദരിക്കണം. ഇത് ശിവസേനയുടെ ആവശ്യമാണെന്നും അദ്ദേഹം പറഞ്ഞു.
താക്കറെയുടെ ജന്മശതാബ്ദി ഒരു വര്‍ഷം അകലെയാണെന്ന് റാവുത്ത് അഭിപ്രായപ്പെട്ടു. ശതാബ്ദി ആരംഭിക്കുന്നതിനുമുന്‍പ് അദ്ദേഹത്തിന് ഭാരതരത്ന ലഭിക്കേണ്ടത് ആവശ്യമാണ്. നിങ്ങള്‍ക്ക് വീര്‍ സവര്‍ക്കറിന് ഭാരതരത്ന നല്‍കാന്‍ കഴിഞ്ഞില്ല.
നിങ്ങള്‍ ബാല സാഹിബിന് ഭാരതരത്ന നല്‍കിയാല്‍ അത് വീര്‍ സവര്‍ക്കര്‍ക്കുമുള്ള ബഹുമതിയായിരിക്കുമെന്നും സഞ്ജയ് റാവുത്ത് പറഞ്ഞു. ഇന്ത്യാ മുന്നണിയുടെ ഭാഗമായുള്ള ശിവസേന ഈ ആവശ്യം ഉയര്‍ത്തി മുന്നോട്ട് പോകുന്നത് കോണ്‍ഗ്രസിനെ വെട്ടിലാക്കിയിട്ടുണ്ട്.
