രാജസ്ഥാന്‍ റോയൽസ് ആവേശത്തിൽ; ടീമിനൊപ്പം ചേർന്ന് സഞ്ജു സാംസൺ
ഐപിഎൽ 2025 സീസണിന് മുന്നോടിയായി രാജസ്ഥാന്‍ റോയല്‍സ് ക്യാമ്പിനെ ആവേശത്തിലാക്കിക്കൊണ്ട് ക്യാപ്റ്റനും മലയാളി താരവുമായ സഞ്ജു സാംസണ്‍ ടീമിനൊപ്പം ചേർന്നു. സോഷ്യല്‍ മീഡിയയിലൂടെയാണ് രാജസ്ഥാന്‍ റോയല്‍സ് ഇക്കാര്യം പുറത്തുവിട്ടത്. ഞായറാഴ്ച സണ്‍റൈസേഴ്‌സ് ഹൈദരാബാദിനെതിരായ റോയൽ‌സിന്റെ ആദ്യ മത്സരത്തിൽ സഞ്ജു കളിക്കുമെന്നുറപ്പായിരിക്കുകയാണ്.
കൈവിരലിനേറ്റ പൊട്ടലിനെ തുടര്‍ന്ന് ശസ്ത്രക്രിയയ്ക്ക് വിധേയനായ ശേഷം ഫിറ്റ്നസ് വീണ്ടെടുക്കുന്നതിനായി ബെംഗളൂരുവിലെ എന്‍സിഎയിലായിരുന്നു സഞ്ജു സാംസണ്‍. അവിടെ നിന്നും ക്ലിയറന്‍സ് ലഭിച്ചതോടെയാണ് സഞ്ജു ഇന്ന് ടീമിനൊപ്പം ചേര്‍ന്നത്. ഹൈദരാബാദിനെതിരായ മത്സരത്തില്‍ സഞ്ജുവിന് ബാറ്റ് ചെയ്യാൻ കഴിയുമെങ്കിലും കീപ്പ് ചെയ്യുമോ എന്ന സംശയമാണ്.
പൂര്‍ണമായി ഫിറ്റായതിന് ശേഷം മാത്രമേ വിക്കറ്റ് കീപ്പിങ് ചുമതല സഞ്ജു ഏറ്റെടുക്കാന്‍ സാധ്യതയുള്ളൂ. വിക്കറ്റ് കീപ്പിങില്‍ നിന്നും സഞ്ജുവിനു മാറിനില്‍ക്കേണ്ടി വന്നാല്‍ പകരം ഈ റോള്‍ ഏറ്റെടുക്കാൻ സാധ്യതയുള്ള താരം ധ്രുവ് ജുറേലായിരിക്കും. കഴിഞ്ഞ മാസം ഇംഗ്ലണ്ടിനെതിരെ നടന്ന ടി20 മത്സരത്തിനിടെയാണ് സഞ്ജു സാംസണിന്റെ ചൂണ്ടുവിരലിന് പരിക്കേറ്റത്.
