
സുഭാഷ് ചന്ദ്രബോസ് ജനിച്ച ദിവസം മരിച്ചെന്ന പോസ്റ്റ്…രാഹുല് ഗാന്ധിക്കെതിരെ കേസ്
കൊല്ക്കത്ത: സുഭാഷ് ചന്ദ്ര ബോസിന്റെ ജന്മദിനം ആഘോഷിക്കുന്ന വേളയില് മരണ തീയതി പരാമര്ശിച്ചതില് ലോക്സഭാ പ്രതിപക്ഷ നേതാവ് രാഹുല് ഗാന്ധിക്കെതിരെ കേസെടുത്ത് കൊല്ക്കത്ത പൊലീസ്. ഹിന്ദുത്വ ഗ്രൂപ്പായ അഖില ഭാരതീയ ഹിന്ദു മഹാസഭയുടെ പരാതിയിലാണ് തെക്കന് കൊല്ക്കത്തയിലെ ഭവാനിപുര് പൊലീസ് രാഹുലിനെതിരെ എഫ്ഐആര് റജിസ്റ്റര് ചെയ്തത്. സുഭാഷ് ചന്ദ്ര ബോസിന്റെ ജന്മദിനത്തില് അദ്ദേഹത്തെ സ്മരിച്ചുകൊണ്ട് രാഹുല് ഗാന്ധി സമൂഹ മാധ്യമമായ എക്സില് പങ്കുവെച്ച പോസ്റ്റിലാണ് അദ്ദേഹത്തിന്റെ മരണ തീയതി പരാമര്ശിച്ചത്.
1945 ഓഗസ്റ്റ് 18-ന് സുഭാഷ് ചന്ദ്ര ബോസ് മരിച്ചെന്നായിരുന്നു രാഹുലിന്റെ പോസ്റ്റിലുള്ളത്. ഇതിന് പിന്നാലെ രാഹുലിനെതിരെ രൂക്ഷ വിമര്ശനവുമായി തൃണമൂല് കോണ്ഗ്രസ് രംഗത്ത് വന്നു. സുഭാഷ് ചന്ദ്ര ബോസിന്റെ ജനന തീയതി അറിയാമെങ്കിലും മരണ തീയതി ആര്ക്കും അറിയില്ലെന്നും അദ്ദേഹത്തിന്റെ മരണ തീയതി ആര്ക്കും അറിയില്ലെന്നായിരുന്നു ബംഗാള് മുഖ്യമന്ത്രി മമത ബാനര്ജിയുടെ പ്രതികരണം.
നേതാജിയുടെ മരണത്തിലെ ദുരൂഹത കോണ്ഗ്രസ് എക്കാലവും മൂടിവെക്കുകയാണെന്നായിരുന്നു തൃണമൂല് കോണ്ഗ്രസ് നേതാവ് കുനാല് ഘോഷിന്റെ ആരോപണം. നേതാജിയുടെ തിരോധാനവുമായി ബന്ധപ്പെട്ട ദുരൂഹമായ കാര്യങ്ങളും കോണ്ഗ്രസ് മൂടിവയ്ക്കുകയാണ്. നേതാജി എവിടെയായിരുന്നുവെന്നോ ഇപ്പോള് എവിടെയാണെന്നോ ഉള്ള കാര്യം കോണ്ഗ്രസ് മറച്ചുവെച്ചു. എന്നാല്, രാഹുല് ഗാന്ധി നേതാജിയുടെ മരണ തീയതി പ്രഖ്യാപിച്ചിരിക്കുകയാണെന്നും രാഹുല് ക്ഷമാപണം നടത്തി പോസ്റ്റ് തിരുത്തണമെന്നും കുനാല് ഘോഷ് ആവശ്യപ്പെട്ടു.