ബിജെപിയിലേക്ക് ക്ഷണം കിട്ടി, ഒരിക്കലും ബിജെപിക്കാരനാകില്ലെന്ന് മറുപടി കൊടുത്തു; ശശി തരൂർ
കോഴിക്കോട്: ബിജെപിയിലേക്ക് തനിക്ക് ക്ഷണം ലഭിച്ചിരുന്നുവെന്ന് തുറന്നുപറഞ്ഞ് കോണ്‍ഗ്രസ് പ്രവര്‍ത്തക സമിതി അംഗവും തിരുവനന്തപുരം എംപിയുമായ ശശി തരൂര്‍. മലയാള മനോരമ ഹോര്‍ത്തൂസ് വേദിയിലായിരുന്നു രാഷ്ട്രീയജീവിതത്തിലെ നിര്‍ണായക നാളുകളില്‍ വന്ന ആ ക്ഷണത്തെക്കുറിച്ച് തരൂര്‍ മനസുതുറന്നത്.
യുഎന്‍ സെക്രട്ടറി ജനറല്‍ സ്ഥാനത്തേയ്ക്ക് മത്സരിച്ച് പരാജയപ്പെട്ട കാലത്താണ് ഈ സംഭവം ഉണ്ടായതെന്നാണ് തരൂര്‍ പറയുന്നത്. അന്ന് വാജ്‌പേയി സര്‍ക്കാരിലെ ഒരു മന്ത്രി ന്യൂയോര്‍ക്കിലെ തന്റെ ഓഫീസിലെത്തി ബിജെപിയിലേക്ക് ക്ഷണിച്ചു. എന്നാല്‍ തങ്ങള്‍ ഇരുവരുടെയും കാഴ്ചപ്പാട് ഒന്നല്ലാത്തതിനാലും, രാജ്യത്തെ തങ്ങള്‍ വീക്ഷിക്കുന്ന വിധം വെവ്വേറെയായതിനാലും താന്‍ ഒഴിവാക്കിവിട്ടതാണെന്നും തരൂര്‍ മനസുതുറന്നു.
വര്‍ഷങ്ങളോളം താന്‍ ഒരു രാഷ്ട്രീയത്തിലാണ് പ്രവര്‍ത്തിച്ചത്, അന്നെല്ലാം താന്‍ വിമര്‍ശിച്ച മറ്റൊരു രാഷ്ട്രീയത്തിലേക്ക് പോകാന്‍ തനിക്ക് പോകാന്‍ സാധിക്കുമായിരുന്നില്ലെന്നും തരൂര്‍ കൂട്ടിച്ചേര്‍ക്കുന്നുണ്ട്. ഒരുപക്ഷെ അവര്‍ തന്നെ വിദേശകാര്യ മന്ത്രിയാക്കുമായിരുന്നെന്നും എന്നാല്‍ ഒരിക്കലും തനിക്ക് ഒരു ബിജെപിക്കാരനാകാന്‍ സാധിക്കില്ലെന്നും താന്‍ മറുപടി പറഞ്ഞതായും തരൂര്‍ വെളിപ്പെടുത്തുന്നുണ്ട്.
